NTUMUA ZA TATA NZAMBI'A MPUNGU

1. Tata Nzambi'a Mpungu wavambisa makanda ye zindinga. Kua dionso kanda dia bantu, Tata Nzambi wavana yandi Nsi, ovo Ntoto mia kanda diodio.

Teka Ntoto mia Kongo, kidivo miakituka mia Banzenzak i kolamana Luzolo lua Tata Nzambi zolele dio vo Ntoto mia Kongo miakalanga kaka mia Bakongo.

2. Bisi Mazulu ka bena kiese nkutu ko, bu bawilu dio vo : Mbua za Ntantu zatambudidi dio mu tek Ntoto mia Manianga, mia Mayombe, mia Mboma, ye mia Muanda, kua Banzenza !

Idina bika Bakongo Bavila, bena ye ngindu za teka Ntoto mia Bakongo kua Banzenza, bayambula nsamu miawu miomio, ye lomba nlemvo kua Tata Nzambi, ye kua Bakulu beto mu ngonda yayi yakumi (= Octobre) yi tuna bambukila Mfumu Kimbangu, Tata Lubeladio, ye Ntotela Vita Nkanga moyo.

3. Mu nsiankulu, Bamindele bu banata kinkole ku Kongo, ye tomba mu yiba Ntoto mia Kongo, Bakulu beto ka bazola dio nkutu ko. Idina, batelama nangui, banuana mvita, ye vana menga mawu mu diambu dia tanina Ntoto mia Kongo.

4. Kitantu kiseki va kati kua beto na beto Bakongo mu mavata meto. Idina mpe, Bakulu beto ka bena kiese nkutu ko mu diambu dia kitantu kiokio.

I mu bila kiokio batumini dio, kidivo Bakongo babo bavanga Nsukululu a Ntima mu ngonda yayi yavua, ye vumbula nsingu za Bakulu beto mu lumbu kiantete kia ngonda yakumi (1-10-2005) ya mvu wawu.

5. Mu diambu dia Zola kuandi mu beto Bakongo, Tata Nzambi'a Mpungu watuvana kimpuanza mu 1960. Kansi, bu tuabaka kio, ni tuasa mayuya ye sotona Mbele ya Lulendo va ntoto. Mu bila kiokio, Bakulu beto banionga, bafuema, batuteka nima.

Tuka mu ntangu yoyo, makanda ma kisi Ntandu (Bafilistea) matuziona kimfumu, ye yantika kutukuamisa mu Kongo dia Bakulu beto.

Buabu, bisi Bazulu bazolele muangasa Zandu dia bangulu na bambua, ye vutula Kimfumu kua Bakongo ; kansi tekela mu vanga dio, Bakongo babindamene teka vutula nguisani va kati kua bawu na bawu, ye vumbula nsingu za Bakulu bawu bafuema.

6. Kimpuanza kia Nsi yayi i Bangunza balomba kio. Mu diambu dia kimpuanza kiaki, tuka mu 1706 nateye mu 1914, mu 1921, nateye mu 1951, Bangunza bayokua ku tiya bakotesua mabokolo mampila mu mpila, kansi ka bayoya ko, nateye tuabaka kimpuanza mu 1960.

7. Kimpuanza bu kiamana bakama, Bamayala ba Kongo bateka Bangunza nima, ye yantika kubasakanana, ye bisa mu kubasadisanga, bonso busadusuluanga Babundu mankaka.

Ku masa, kua Mpemba Kalunga, Bakulu beto banionga mu diambu diodio mpe.

I mu bila kiokio mpe tufuete vangila Nsukululu a Ntima mu Ngonda yayi, kuenda vedisa ndiamu za Bakulu beto kiamitanu 30-9-2005, ye kuenda vumbula nnsingu za Bakulu beto ku ndiamu, mu mavata meto kia sabala kia 1-10-2005.

8. Lu Bakongo Mpangi zame,

Mu diambu dia kisalu kiamfunu ki tufuete saleno mu mavata meto mamo ma Kongo mu ngonda yakumi, yafua Ntotela Vita Nkanga (Kimayala) ye Mfumu Kimbangu (Kingunza), lutanga Kongo Dieto 424, ye Kongo Dieto 425 ntete, landila diodio, lutanga ye tangisa mpe Kongo  Dieto 421; Kana kuzingila kia kukia.

NE MUANDA NSEMI

Nlongi'a Kongo

Ntuazi a Kongo Diakati

Kinsasa, kia 8-9-2005